經濟發展及勞工局局長葉澍堃噚日出席立法會時，突然覺得唔舒服，佢唔係俾議員質到頭暈，而係因感冒菌入耳，令耳水不平衡而頭暈暈。為怕企唔穩，佢特別向主席范徐麗泰提出，希望坐低回答議員提問，葉澍堃會後話要多得醫學界立法會議員郭家麒同衞生福利及食物局局長周一嶽為佢會診，佢離開立法會時已唔使人扶住，但今日應該唔可以同本港旅遊業界代表團去新加坡做推廣活動嘞。
浸會醫院耳鼻喉科中心主管周振權話，內耳入面嘅耳水受病毒感染會令耳水不平衡，覺得頭暈，一般人過勞、睡眠不足都有機會出事，佢話若情況輕微，可嘗試集中望住遠處一點景物約三十秒，用意志力話畀個腦知頭暈只係受耳水影響嘅假象，嚴重嘅就梗係要睇醫生。
中醫師公會前會長關之義話，中醫認為眩暈同肝風重有關，操勞過度都易中招，奉勸高官應該注意休息。
九九年，前政務司司長陳方安生出席立法會時，因耳水不平衡而要中途離席，喺立法會休息咗五個鐘先至離開。
傳真︰2623-9278
電郵︰[email protected]