日本偶像歌手hitomi最近除咗推出全新寫真散文集《LoveLifeStyle》之外，同期亦都推出咗全新細碟《Japanesegirl》，重喺唱片嘅特別版內附送特別設計嘅花甲。唔知hitomi係咪有意爭做花甲女王，佢同深田恭子喺新一期時裝雜誌《ViVi》內大晒不同款式嘅花甲，一個夠潮，一個夠cute，可謂平分秋色。
hitomi着上一件性感背心，戴上色彩鮮豔嘅橫間花甲，重特登襯埋相同顏色嘅手鈪，轉頭佢又換上間條套裝同迷你裙，但就襯上閃閃星花甲，令十指更為搶眼。
夏日浸溫泉
甚懂宣傳之道嘅hitomi亦都去到海灘拍攝，佢着上牛仔裙兼換埋同CD附送一模一樣嘅花甲，乘機為新碟宣傳。
雖然hitomi好歎咁瞓喺沙灘上面影相，但佢喺自己嘅網頁上就話，其實夏日炎炎最好去浸熱辣辣嘅溫泉，咁先至夠正喎！
此外，憑日本電影《下妻物語》人氣爆燈嘅深田恭子，亦示範咗「可愛公主型花甲」、「黑、銀Rock花甲」同「激凸雜果花甲」，為各位愛靚嘅姊妹提供唔少今個夏季嘅扮靚貼士。