噚日場NBA總決賽第六場，由馬刺主場對衞冕嘅活塞，相信好多球迷都諗住八年來從未喺馬刺主場贏過波嘅活塞輸硬，馬刺球員嘅大班親朋戚友更加到齊SBC中心打氣，諗住賽後一齊開香檳慶祝。
戰勝飛機恐懼症
其中當然以《靚太唔易做》嘅主角、着住心口印有男友柏加九號球衣嘅小背心，靚女伊娃歌莉亞（EvaLongoria）最為搶鏡喇！不過最苦心嘅要算係馬刺斯洛文尼亞外援烏維治嘅八十二歲祖父，呢位老人家為咗可以親眼睇住個乖孫捧盃，終於克服咗自己多年嘅坐飛機恐懼症，三十三年嚟第一次離開家園，遠赴美國幫個孫打氣。
可惜佢哋全部都好夢成空，因為馬刺噚日竟然爆冷喺主場畀活塞打敗，搞到班馬刺球員嘅親友乘興而來，最終卻失望而回。
不過馬刺喺聽日第七場重有最後一個稱王機會，到時就要睇佢哋能唔能夠把握主場嘅優勢贏波，嚟報答親友嘅支持。