聞說曾經有人在關刀鞋同三間鞋嘅官方Outlet執到筍嘢不特止，重可以將對波鞋轉賣畀舖頭或者索性喺自己開嘅舖頭度賣，平買貴賣，轉一轉賺百幾二百，唔通真係咁離譜？今勻一於去呢兩個Outlet走走，發現真有其事！
記者：黃藹瑩 攝影：梁細權 Model：Becky
官方Outlet有驚喜
蒲入呢兩個官方嘅Outlet，keep住有耐性咁行多一陣，雖然留意到波鞋嘅款式唔算太多，不過原來好有驚喜！喺呢度小記最大嘅收穫有兩對鞋，一對係NikeAirForce1，而另一對就係Nike嘅AIRMAX95，顏色雖然唔同，但個款就完全一樣，拎個價錢同旺角波鞋舖比一比，大大話話都有百幾二百蚊出入，慳埋都夠食幾餐飯！
賺差價有得執
筆者曾經走入多間波鞋舖問老闆啲貨點嚟，佢哋都異口同聲話由好多嘅地方入貨，不過小部份舖主承認，曾經聽聞有人從香港官方Outlet入貨，轉手落舖再賣，賺取其中差價，即使一對差價幾十蚊，其實都有得執，不過據稱只有少數人會咁做，因為香港嘅官方Outlet賣嘅波鞋絕大部份都係斷碼貨。
掠水證物
1.AIRMAX95
大家同樣都係Nike嘅AIRMAX95，彩虹嘅設計直頭一模一樣，只不過係白底同黑底嘅分別，若果你都只不過係鍾情rainbow或者只係想擁有對AIRMAX的話，咁就咪諗咁多啦！
2.AirForce1
貴$330
大家都係AirForce1之嘛，個價錢就差成倍喎！若果閣下唔嫌棄對波鞋唔係蛇皮的話，平平哋買呢對黑底白剔嘅AF1都係唔錯嘅選擇！
3.ACE83
呢兩對鞋比起官方個Outlet都只不過係平20蚊，計埋車費對有啲人嚟講重可能係蝕，不過你係鍾意Outlet嗰對的話就要快手，因為所剩無幾啦！
旺角潮鞋主理人點睇倉貨？
花園街羅四
賣波鞋年資：91年到𠵱家共14年
至愛鞋款：以前歐洲同蘇聯做嘅adidas所有款式。
咩鞋最襟興：一定係Nike嘅AirForce1，因為後生會買，阿叔又會買，而且個款較中性，男女着都得。
波鞋行程預測：未來有咩波鞋會炒得起就真係要視乎對鞋多唔多貨，係咪好多人搵啦，好似AF1咁，淨白色同淨黑色都好多人會搵。幾時會出一次新鞋款就好難講，不過多數每一季都會有。
平買貴賣？點睇？𠵱家Nike同adidas嘅倉好少會有好嘅波鞋賣，喺嗰度買鞋再拎出嚟炒都無咩可能！對鞋如果係炒得嘅通常一早已經賣晒啦！不過值得一提嘅係Nike同adidas嘅散貨倉都會喺觀塘嘅工業大廈搵到，嗰啲工業大廈入面有好多賣假嘢。
瓊華Dantley
賣波鞋年資：做咗10年賣波鞋sales，自己開舖到𠵱家5年。
至愛鞋款：𠵱家雖然唔興，但最冧嘅都係ReebokPumpFury系列。
咩鞋最襟興：adidassuperstar（最basic嗰款），平之餘重好易襯，連I.T都用嚟做uniform鞋啦！
波鞋行程預測：高筒鞋已經唔興，個價跌得好快。
平買貴賣？點睇？我哋行家唔會喺香港嘅Outlet入貨。我哋入貨嘅地點真係咩地方都有，可能會喺外國嘅Outlet搵，因為外國賣唔晒啲鞋通常一個月就會將送去Outlet。香港嘅Outlet有時會賣啲Bgrade鞋，即係次貨，睇得出！總之可以咁講，去Outlet可以買到平波鞋，但唔會有潮波鞋囉！」
你會唔會入倉買波鞋？
Becky
「我唔會去啲倉度買鞋，因為都係啲舊款嚟㗎啦，費事浪費時間。𠵱家我最想要嘅係上海版嘅金色剔DunkLowPro。」
阿文
「我有去過觀塘個Outlet，但其實唔會有咩收穫，都係啲舊款。我買波鞋通常都會去旺角波鞋街，因為啲款型啲又值錢啲。」
Alex
「我都有試過去啲Outlet到執到筍嘢，不過係啲斷碼貨，唔係次次都咁好彩。買波鞋通常都去番旺角。」
波鞋老闆 熱賣推介
除咗官方Outlet，我亦問過波鞋舖老闆，請他揀出三款當今最Hit款嘅家族成員，睇嚟又係時候換鞋咯！
1.NikeAirForce1
呢幾對鞋個樣都好似，就似進化論咁，真係愈變愈pro！
AirForce1$899
2.adidassuperstar
由最basic嘅superstar樣發展出唔同嘅款式，照樣熱賣！
3.NikeAIRMAX
Nike嘅AIRMAX都係常青嘅款式，真係幾時都咁興！
落舖買鞋已成習慣
肯出鏡接受訪問嘅波鞋老闆都話唔會喺香港波鞋倉度入貨再賣，甚至隨街訪問啲後生仔女，雖然佢哋都有落倉執平嘢，但買波鞋始終離不開落舖，記者亦搜尋過兩大品牌嘅官方Outlet，發覺舖內款式係多，不過都唔係當今最潮嘅款，如果你唔嫌款式舊，又有時間嘅，可能比筆者執到更多平買貴賣嘅證物！
Nike倉
觀塘開源道73至75號業發工業大廈第二期8G
adidas倉
觀塘開源道73至75號業發工業大廈第二期11H
