樓價由沙士低點反彈，升咗兩年幾，香港人忘記晒七年惶恐，又再迷信炒樓可以發達。三個畢業冇耐嘅大學生，上個月夾份用五萬蚊首期，入咗件沙田希爾頓中心D座高層單位，四百三十七呎，攞三個月成交期，諗住炒番轉。
點知個市因為加息轉靜，市場多咗減價甚至蝕讓個案，搞到呢幾個樓市初哥心情十五十六，擔心遲啲可能要蝕本，惟有速速放售甩身。聽美聯曾慶聲話，大學生小業主終以一百零五萬沽出個單位，計埋使費淨賺幾千蚊。真係幾乎唔夠買驚風散。
單位原來俾一位區內資深炒家睇中，佢認為樓市只係短暫波動，但見機不可失，梗係乘機大力鋤價啦，終於用低市價約一成買入件貨。曾慶聲補充話，呢單係希爾頓中心今個月第一宗買賣。班大學生唔知係咪第一次置業，如果係，都係好經驗。
電郵地址：[email protected]