上星期六（六月十八日），《蘋果》頭版頭條嘅標題認真刺激，左丁山咬緊塊麵包之時，拎起張《蘋果》，啊的一聲，麵包跌咗落地。「何鴻燊講足七年大話」！《蘋果》總編輯想踎監乎，咁樣講港澳大聞人？
睇埋內容，先知道係何鴻燊親口講：「迫到我講咗七年大話。」八十幾歲嘅燊哥每次開金口，都十分精采，記者當佢係蜜糖，追到佢實攞soundbite，燊哥好少令人失望。不過咁喎，董特首在任之時，民望甚低，好多基層市民夠膽鬧特首，點解啲高高在上嘅大人物要揞住個心講大話呢？佢哋咁多錢，十世使唔完，重有乜嘢好驚呀？
何鴻燊講足七年大話，𠵱家盡爆心中情，見到個香港仔做特首，心情舒暢，講唔定以後重有嘢爆。佢令我哋想起國家領導人、政協副主席霍英東之痛苦故事，霍先生苦心經營南沙二十年，俾啲地方官逼迫，唔見咗四十億銀，一句聲都冇出，直至貪官因其他理由被拘押，霍先生嘅秘書何銘思先至敢喺報紙大吐苦水。原來我哋小市民驚生活無着，臨老無依，整日為錢煩惱，而最大粒嘅有錢人就會怕一啲地區芝麻綠豆官，點解會咁樣，想極都唔明。
好嘞，香港仔曾蔭權做特首，以後七年會唔會有人講足七年大話呀？以後輪到上海幫商人講大話呀？上星期四，《蘋果》報道何生捐咗一百萬元畀董太做社會活動善事，對照番佢承認在董先生任職期內，講足七年大話之事，直情係林超榮加黎文卓加阿寬都寫唔出嘅幽默喜劇故事。
以後大家聽到啲大人物唱好樓市，唱好股市，唱好乜乜物物，不妨諗吓係唔係有人揞住個心講大話噃，總之信自己個荷包（你嘅財政能力）好過信乜乜權威！