關心妍（Jade）日前應邀到上海出席「第六屆亞洲冬季運動會」記者會，呢個運動會將於○七年喺長春市舉行。大會所以搵斯斯文文嘅阿Jade幫手，原來係貪佢形象夠健康，阿Jade喺會上同國家體育總局局長劉鵬以及長春市副市長安莉握手時，佢哋重讚阿Jade真人靚過上鏡，開心到佢笑到見牙唔見眼。
「慘過唱歌」
雖然阿Jade見慣大場面，又喺紅館開過演唱會，但呢次做運動會嘉賓，阿Jade竟然話慘過唱歌。原來佢要負責開場致辭，加上當日有超過半百傳媒採訪，佢一下子要用國語娓娓講出運動會歷史，重要一字都唔可以錯嗰隻，都咪話唔緊張！
阿Jade話前嗰晚緊張到失眠，好驚講錯說話出醜，唔知佢係咪怕好似莫文蔚咁喺金曲獎中發音不標準出洋相呢？好彩佢最後都順順利利，大步檻過。Jade又話自己當年喺加拿大留學時，係滑雪高手，所以啱晒做冬季運動會嘉賓。