曾蔭權競選辦公室重幫煲呔埋緊條數，民主黨喺上星期已經幫主席李永達計掂晒條數，合計用咗十六萬幾幫達仔選特首，以達仔攞咗五十一個提名計，即係每個提名用咗三千一百幾蚊。
達仔選特首達到乜嘢效果，大家都有眼睇，唔使八方多講。民主黨上星期嘅常委會，就簡單總結咗今次選舉，幫達仔搞公關嘅中常委馮煒光，會上梗係話達仔選特首好有效果啦！馮煒光話，因為達仔參選，令到「四無選舉」變咗，有對手、有政綱、有面向市民，但仍然係無投票，即係話四無選舉變成「三有選舉」。
雖然中委狄志遠今次攞咗豁免，唔使提名畀達仔，但黨內都係覺得佢咁做好唔妥，以後唔想有類似事件發生，日後一定會規定黨員提名自己友參選，唔可以手指拗出唔拗入。
傳真︰2623-9278
電郵︰[email protected]