早排本港樓價係咁升，新高成交紀錄不斷湧現，唔少個案用回報率計，重係計極都計唔掂數嗰隻，令人諗極都諗唔明，點解咁高價都有人肯買。 有業內人士對蘭西講，有啲內地富豪，手上有大筆現金，擔心放喺內地，分分鐘出事，索性嚟香港買件貨收租，令自己安心啲。 所以呢班買家買樓，只求有樓喺手，根本唔會睇回報率，若果唔係，又點肯入市呢？ 對發展商嚟講，真多得呢班「豪客」，有羊生羊太帶頭，個樓盤就變得易賣好多，重可以交到條靚數畀老細睇。