二○○五年度候選香港小姐前日在斯里蘭卡探訪海嘯災民，不少佳麗忍不住當場落淚，但仍裝出笑容。9號麥雅緻自覺福份並非必然，日後會更珍惜現時擁有的一切，至於10號黃家皚則表示為災民表現堅強而開心落淚。 記者卓美娟、葉君海斯里蘭卡直擊
二十位候選港姐前日在斯里蘭卡進行最後一日外景拍攝工作，首先探訪海嘯災民居住的臨時房屋區，然後再到海龜養殖場參觀。災民所住的臨時房屋區衞生環境欠佳，地面滿布泥濘，屋內亦有不少蒼蠅，而不少小朋友更沒有衣服可穿，赤裸身子四處奔跑。
送T恤齊畫畫
不少港姐佳麗包括9號麥雅緻及10號黃家皚等目睹災民情況後也忍不住當場落淚，至於15號陸詩韻雖然眼濕濕，但面對一班小朋友仍強忍淚水，裝出笑容。及後眾佳麗送上T恤給一班小朋友，又跟他們一起在T恤上畫圖案，而隨行記者亦送上零食乾糧，令小朋友甚為雀躍。
事後10號黃家皚說：「好感動，呢種感動係開心嘅，我哋呢個旅程係帶開心畀災民，我唔係憐憫佢哋而喊，而係見佢哋咁堅強，所以好開心，佢哋嘅笑容唔似係啱啱經歷完海嘯。」雖然黃家皚首次探訪貧童，不過她有助養柬埔寨小朋友，每逢過時過節便會與小朋友通訊，甚有愛心。
施比受更有福
至於9號麥雅緻則說：「好心痛，見到佢哋覺得自己好幸運，探完佢哋之後覺得福份唔一定人人擁有，所以要珍惜現時擁有嘅嘢，而今次真正感受到施比受更有福，幫人都係一種福氣。」至於15號陸詩韻則說：「自己冇喊，佢哋情況比預期好，至於佢哋居住嘅環境唔係咁好都冇辦法，可能係資金唔足夠。」
