日本女歌手濱崎步俾師妹大塚愛同鈴木亞美迫得冇氣唞，所以為咗催谷八月推出嘅細碟，點都要幫時裝雜誌影番輯靚相嚟造吓勢，步姐重剪咗個新髮型，着住夏日性感新裝，為時裝雜誌《ViVi》拍攝寫真。
八月推出新碟
步姐早排開個唱嗰陣，無啦啦扮山口百惠玩封咪，搞到佢啲fans鬼咁緊張，以為偶像想引退。
不過，小休一輪嘅步姐，終於喺時裝雜誌《ViVi》蒲頭，重大事張揚佢八月會推出細碟《fairyland》！步姐話裏面有首新歌配合夏日氣氛，又以好靚嘅歌詞配搭喎，所以佢特登剪番個新髮型，着埋露膊同露臍嘅夏裝嚟襯番嘞。
九月赴韓義演
喺《ViVi》入面，步姐公開同工作人員出外拍攝寫真嘅情況，又喺書中表白現時嘅心態，步姐話：「我只係得二十六歲，仍未付出百分百嘅力，我重有好多嘢想做！」講到明佢未有意思引退啦！
另外，韓國有消息話九月喺首爾會舉行一個幫助南亞海嘯受害者籌款嘅韓日SuperConcert，由於步姐上年參加過喺韓國舉行嘅AsianSongFestival，所以佢同韓國女歌手BoA都獲邀請演出。