當年做過綜藝節目主持嘅盧敏儀（Money），自從九八年毅然退出娛樂圈後，佢花咗四年時間喺港大修讀法律，跟住又去咗英國讀埋法律碩士，喺實習咗一年、又拜過清洪做師傅之後，Money終於成為咗大律師。
行到盡頭不妨轉型
馮仁昭知道Money近排忙緊打一單涉嫌收受回佣嘅案件，因為首次同廉正公署（ICAC）打官司，身為辯方代表嘅Money自然特別緊張，經過四日審訊，噚日喺九龍城裁判法院判決，結果辯方代表嘅Money勝訴，Money老公孫敬安都有去聽審，幫老婆打氣。
馮仁昭噚日打電話恭喜孫敬安，佢話：「我𠵱家已經同Money行緊街，諗住買份禮物畀佢，打贏ICAC唔係咁易，佢都付出咗好多，不過以後重有漫長嘅路要行，有時見到佢要捱更抵夜都好心痛。」孫敬安好支持藝人轉型發展，佢話：「做嗰行一旦行到盡頭，不妨嘗試轉型，咁樣先會更上一層樓。」
馮仁昭好支持佢嘅講法，時下啲青年都好應該以Money做榜樣，前途一樣一片光明。