工業股過去兩年，一直受原材料價格上升等問題困擾，不但影響業績，更令股價低沉，但仍有唔少工業股表現硬淨，例如富士高（927），股價相比年初上升10幾個巴仙，現價仍然企在高位。公司明日公布全年業績，據講如無意外，應可延續上半年的盈利增長。
經紀黃話，富士高業績保持增長，原因係去年開始為流動電話生產商生產無線手機耳筒，呢樣生意令富士高獲利不菲，兼且提升毛利率。
富士高截至去年9月底止中期業績，盈利較去年同期急升1.9倍至3065萬元。當時老闆講過，若果下半年業績保持到上半年的強勁增長，就會考慮派發特別股息。
金手指原來揸住唔少富士高，但由去年起，一直沽貨獲利，但與此同時，有另外一個基金接貨，同時街貨唔多，所以股價一直保持在高位。富士高昨日微跌0.7％，收1.42元，成交股數35.8萬股，金額50.8萬元。
慕容小初