曾特首上場，除了要大裝修過上亞厘畢道的「夢幻樂園」，撬走晒上一手的偷聽器之外，他的辦公室，也要採取強勢裝置，下列裝備，是必要而且斷然的措施：
測謊機。坦白從寬，過去七年的惶恐令很多人噤若寒蟬，只有極少數像何鴻燊的闊佬夠薑公開講：過去七年，被老董迫，一直揞住良心講大話！對付有權有勢有銀用的大話精，最好設置先進Ｘ光測謊機，照過晒肺，將謊言分等級後才好埋堆。
防跣腳墊。機器未必準，防人之心不可無，防人大代表、左佬和地產商篤背脊之心更加不能掉以輕心。買定防跣腳墊，這兩年雖然未必100%出入平安，至低限度，唔使當眾ＰＫ出醜。
士啤煲呔。起碼要有十打八打存貨，慎防民建聯派出紅粉女兵來他那個冷氣調校到25.5℃的特首辦公室，借口天氣熱，劈了兩杯雪裏紅就順手拆他的治港招牌。煲呔已經成為曾特首這兩年任期內的luckylogo，牽一髮動全身，煩惱絲可以改形象，煲呔千祈唔能夠亂拆，唔好唔信邪。
降落傘。雖然政府總部不是IFC或者紐約世貿中心，唔算高。但曾特首補選，阻住很多紅人上位，暗地裏樹敵都唔知，隨時被人暗算，跳樓都唔掂。櫈底收埋專為九一一慘劇設計的逃生降落傘最保險。
替身。時時埋首辦公，背影故意俾記者偷拍到。吞pop無罪，所有打工仔身同感受。李永達身高幾合標準，可以考慮唔搵民主黨入行會，請佢個黨主席做替身，算是釋出善意的溝通。