曾爵士坐穩寶座，日內上京笑騎騎接受壽爺御扑頭，正式冊封，好多人驚緊，爵士跟住落嚟之後就會目露兇光，你班嘢就死嘞！
「選委」七百一十四票，好多係一路詛咒，一路焗投，各路人馬同時開價攞着數，例如民建聯，就要求增設所謂「政務助理」，橫掃在局長與政務官AO之間，並喝令爵士，呢一層位一定要同民建聯「培養政治人才」！
用納稅人錢開班授徒
納稅人畀錢，公務員讓權，同一個由尤德、李後、魯平年代就開始玩泥沙二十年嘅「民主建港」政黨培養政治人才？都咪話唔風趣。或者知道講大咗，嗱嗱聲縮，話該黨青年團只係得兩三個人，有資格做「政務助理」而已！
冇錯，今日全香港只得曾蔭權爵士一個係公僕王兼領正牌嘅資深專業政治家，可見物以罕為貴，但唔等於人哋有義務用納稅人啲錢同你開班授徒！爵士在競選時，應承「研究」，競選完畢，咁啱線，研究亦有結果，就係所謂政務助理，唔係菲傭嘅「家務助理」（DomesticAssistant），要有資歷、有經驗，同埋絕對唔可以做二五仔！
咁即是話，就算開咗呢層位，對唔住，都唔會畀民建聯！係人都知，民建聯有祖國做靠山，有好多線直通天庭，政務助理上昅爵士肥龍，中窺司局長官，下則監控成班AO，同時向兩個「黨中央」（一個大嘅喺北京，另一個細嘅喺北角）做二五，一時話肥龍太鍾意意大利歌劇，唔夠愛國愛港，一陣又屈何志平飯局太多，呢個政府不如雙手奉送埋畀民建聯包辦，咁係咪違反埋基本法？
唔只民建聯，任命得老左，又點可以唔派番幾個位畀民主派，民主派一樣要培養青年黨員，攝個張韻琪或者陶君行入去，佢條二五線，搭一條去李柱銘度唔緊要，分分鐘又分叉多一條，搭去美國領事館，咁煲呔肥龍咪大鑊？
訓練青年人才可北上
所以「政務助理」，正如賭王當年苦口婆心咁勸諫老董：「呢樣嘢唔通個喎」。想訓練青年人才？不如咁吖，民建聯可以叫中央阿爺幫手，喺廣東湖南啲省長辦公室下低，開一層愛國政務助理，獨家派人上去開速成班受訓，二○○七年，咪可以成功狙擊煲呔，提名到下一代做凸首囉，如果壽爺恩准嘅話。
爆料熱線：29290000、27860099
報料傳真：26239278
報料電郵：[email protected]