一班反對美國人格拉沙入主球會嘅曼聯球迷，眼看事實既定，點反都無用，決定自組一支「新曼聯」，正式參加地區聯賽，循正途望有朝能夠打上超聯，同格拉沙嘅曼聯爭一日之長短！
由為數約三千人嘅曼聯迷組成嘅「新曼聯」，球會名同曼聯差唔多，叫做「曼徹斯特的聯合球會」（FCUnitedofManchester）；最近亦獲聯賽會接納申請，來季將於非職業聯賽組別嘅西北部郡區聯賽競逐。另一支非職業聯賽球隊德羅伊爾斯登（Droylsden）嘅班主兼領隊披斯先生，本身都係曼聯躉，義不容辭地借出自己球會嘅球場，畀呢支「新曼聯」做主場。
披斯先生近日亦已經為「新曼聯」嘅領隊人選進行面試，至於球員，就會喺下周日進行公開招募；由於係業餘性質，基本上唔計較冇人工，係人都可以去試腳，就連我求大俠都心郁郁，想飛過去英國玩下。