岳敦馬房今季表現麻麻，在練馬師成績排名榜，只列在後尾五名。但佢在海外就巴閉咯，名聲大過破盡紀錄嘅告東尼，因為佢訓練嘅「好望角」分別喺澳洲及英國贏出一級大賽，上星期六喺約克馬場嘅皇家雅士葛（RoyalAscot）大賽中，更贏到金禧錦標，馬主後人從英女皇手上接過大銀盃，威到盡，岳敦來自英國，一生人第一次揚威RoyalAscot，視之為一生人大成就，至於騎師靳能，素來威慣，反而冇乜感覺。至於馬主賈世德，係前渣打銀行香港大班，退休後到大新銀行，前年逝世，估唔到遺下匹馬會為後人帶來莫大欣喜。
睇電視轉播，「好望角」以破紀錄時速（一分八秒五八）贏千二米，功在靳能，若非此名世界名師拚命策騎，功架十足，「好望角」可能會輸。「好望角」喺香港跑一千、千二，次次輸畀「精英大師」，完全唔係嗰皮，真係有「既生瑜、何生亮」之嘆，好彩飛出鯉魚門，脫離「精英大師」威脅，立即成為世界短途馬王。以此伸論，香港地，細細地方，竟然同時擁有兩匹世界短途馬王，夠晒巴閉，邊個夠膽話香港賽馬不及世界水平？「精英大師」馬主施雅治不妨考慮吓，不如帶「精英大師」去跑RoyalAscot，與英女皇影番張相吖。
養馬贏一級大賽，係每一個馬主嘅夢想，有時發夢遙不可及，只係想喺沙田或跑馬地威一威啫。今晚跑馬地賽事第七場，老友記黃偉慶隻「成功皇」與杜達輝隻「千禧之光」再度同場競技，兩人當然希望一Ｑ返嚟，又適逢許淇安、淇鑌兄弟嘅「大文豪」，熱鬧咯。黃老爺話許一哥、杜達輝與佢三人都係香江獅子會獅兄弟，好希望今晚第七場可以勝出一條獅子會三重彩，邊個贏都冇乜所謂洛。聽黃老爺一講，急急睇吓排名表，咦，有機會噃，最大威脅可能係龐老大隻「出奇」，一於四隻互串複式。