爆機狂迷：PSP首款第一身射擊<br>《CodedArms》黑客網絡世界之戰

爆機狂迷：PSP首款第一身射擊
《CodedArms》黑客網絡世界之戰

究竟PSP同NDS邊個會成為最後贏家，相信暫時無人答得出，不過講到對遊戲印象深刻，就毫無疑問係NDS較高，更具創意，PSP機能雖高，可惜大多只係翻炒之作，不過今個星期終於有一款值得期待大作推出，講緊嘅係KONAMI嘅《CodedArms》，遊戲完全為PSP而開發，而且重係PSP首款第一身射擊遊戲；試玩後，感覺係動作打得燦爛、畫面靚到重以為拎住部PS2喺街打！

記者：許福合

武器角色均可升級

操控對第一身射擊尤其重要，遊戲本身就有好高彈性，可讓玩家任意調配按鈕，筆者試玩時就將十字掣當作武器轉換，而Joystick就係視點同移動，其他發炮等功能就由「三角形」等掣負責，玩起上來都幾稱心，各位可作參考！
《CodedArms》同一般射擊遊戲唔同，打打殺殺之餘，武器同角色都可以獲得經驗值，武器等級愈高，破壞力愈驚人，而角色等級高咗，生命值亦會提高，咁就無咁易死啦！而冒險中途，將路邊道具破壞或直接打「怪」，都有機會掉武器同彈藥，而且可隨時按需要轉換，由近打嘅手槍到遠程狙擊槍都有，敵人太多時還可以出動手榴彈，武器迷玩落都可以過足癮。

■呢堆「蟲」好勁，要用手槍狂打先有用。

■要應付大群怪物，手榴彈就最好用。

■後期執到把雷電槍，勁！

■畫面相當有水準，同PS2遊戲有得揮。

■狙擊槍模式，好遠就可以轟死怪物。

今次《CodedArms》返嘅行貨有啲特別，介面預設會使用英文，玩家亦可因應需要於Option內改為日文，雖然第一身射擊遊戲唔理劇情都唔重要，不過對唔識日文嘅玩家，使用英文介面打機自然多幾分趣味。而且有傳行貨同水貨喺網絡對戰，可能會有唔夾嘅情況，雖然消息未經證實，但如果個個用行機、玩行Game，就唔使為呢啲無謂嘢而擔心啦！

■機體設計好正，充滿未來味道。

■筆者試玩時要有機器支援，亦要特別版PSP先玩到，不過唔可以出鏡。

趣怪數碼屍體

筆者今次試玩《CodedArms》雖然只係試玩版，不過已經可以玩到好多版圖，連香港KONAMI都未有人玩得晒全部版圖，可見劇情有幾咁豐富！PSP遊戲有個毛病，Load碟次數同時間頗長，試玩版《CodedArms》因為背後有Demo機支援，未能試出真正Load碟速度，不過次數就係筆者可接受範圍內，唔會打打吓Load咁無癮。《CodedArms》故事背景都幾有創意，講玩家係一名黑客，進入網絡世界戰鬥，感覺都幾《22世紀殺人網絡》Feel，所以遊戲內並無打到「標」晒血嘅場面，取而代之每打死怪物或者道具，都會化成一啲數字消失，玩慣血腥暴力，轉吓口味都唔錯。

■槍械設計都屬強項，呢支超級Sniper槍，正斗非常。

■網絡世界戰鬥，怪物道具都會變作數字消失。

■畫面相當有水準，同PS2遊戲有得揮。

迷宮每次不同

《CodedArms》對以記地圖、記怪物位置嘅「打寶」玩家，可能會係一個挑戰！因為玩家死咗之後，或重打同一個關卡，整體版圖的設計，以至怪物出現的位置都會有所不同，更重要係一啲「罕有」道具都好似「有腳周圍走」，每次玩都好有新鮮感。雖然地圖次次唔同，不過就唔使驚會迷路，因為右上角會有一個立體地圖，顯示移動方向同所處身位置嘅出入口，相當好用。打怪時除咗考反應，其實遊戲都有唔少支援功能，例如當瞄準器接近怪物時，就會自動鎖定，對拎住部PSP通街玩嘅玩家就係唔錯設計，否則好難瞄準。今次試玩碟可惜未能試到無線部份，《CodedArms》可支援4人網絡對戰，有唔同模式，如搶旗及對戰等，比單打更為着重戰術。

■瞄準器移近怪物就會鎖定，方便射擊。

■有時會出現立體十字，可補充生命，另外重會有彈藥武器執。

■走到發光位置就可以過版。