尾市中移動（941）、長實（001）等幾隻大藍籌稍稍踢高，恒指反跌為升，進帳33點。港股收市後，期指再挾一挾，升77點，高水52點。期指已越萬四，有機會營造較佳氣氛。
恒指C輪3900：短期大市睇好少少，博恒指C輪，揀3900，8月尾夠鐘，輪價11.9仙，溢價1.7%，槓桿率33.6倍（有效20.9倍），引伸波幅12.3%。
3938壽命長過3900，9月尾到期，輪價13.8仙，溢價1.9%，槓桿率18.8倍（有效12.8倍），引伸波幅16%。3938爆炸力細過3900，比較適合稍為保守嘅炒家。
如果大市升得太急，揸恒指C輪有錢賺，最好心足，落袋嘅錢先至係真錢，賺咗至算，到時或者反手造淡嗰邊，買恒指P輪。
和黃C輪4872：和黃（013）收69.75元，爬高兩格，有啲C輪未跟正股升，可以諗多少。4872明年6月到期，輪價54仙，溢價5.6%，槓桿率12.9倍（有效7.9倍），引伸波幅15.7%。呢隻係長命輪，對正股嘅反應比較慢。
3808係短期輪，下月中夠鐘，對正股反應比較敏感，昨收29仙，即日由低位反彈20%，比較適合望住報價機睇住正股變化嘅炒家買賣。
章盛