恒指與期指都係望住萬四關而未能破關。恒指升33點，都係勉強多得滙控（005）尾市嘜125元（124.50元買家2.1球，125元沽家11球），同長實（001）嘜上73.25元。滙控升1格，長實升2格，總共拉動恒指22點。
新地C輪4821：新地（016）高低相差只係兩格，平收74元。新地熱門C輪中，4821跌得最傷，收27.5仙，冇咗11%。炒輪最怕正股牛皮，好多時正股冇郁隻輪都會縮水。個別銀行再加按揭利率，地產股冇反應。地產股將來升跌，同銀行利率變化嘅關係會好疏離。
新地暫時都係擺上擺落，三兩格貨仔變化。若見忽然跌幾格，博反彈，吼多少C輪4821。隻輪11月初夠鐘，溢價5.1%，槓桿率26.9倍（有效13.8倍），引伸波幅15.6%。搏殺格，則揀3913，贏輸大好多。新地如果成日企定定喺74元，則兩隻C輪會因溢價收縮而下跌。
中鋁C輪3805：中鋁（2600）係比較醒神嘅國企之一，收4.225元，進帳2.4%。C輪3805收43.5仙，升9%。隻輪9月尾夠鐘，溢價5%，槓桿率9.7倍（有效6.6倍），引伸波幅33.1%，喺中鋁C輪中最睇得吓，不過高追不宜，提防正股有回吐，見回番落40仙以下，先至搵些少博反彈。
章盛