上月底退休、結束滙豐集團三十七載工作生涯嘅大班艾爾敦，一如所料，退而不休。不過，人人以為佢只會做總商會或太平洋地區經濟理事會主席之類公職，唔會再為個別機構服務，點知，羅兵咸會計師行噚日公布，艾爾敦應承做高級顧問，九月一日生效。
艾大班爾敦話，希望同羅兵咸合作，有機會繼續參與中國發展事務。蘭西今次都話羅兵咸犀利，須知大班係中國通，退休前任滙豐亞太區主席，管理成個亞太業務，滙豐入股交行單交易，都喺佢任內成事，羅兵咸請到佢做顧問，發展中國業務一定事半功倍，而且大班嘅經驗同人脈係無價寶。
除咗參與中港事務，艾爾敦又會為羅兵咸全球首席執行官沈德培（SamuelA.DiPiazza）做顧問，並加入羅兵咸全球金融行業領導小組。
電郵地址：[email protected]