俗語話十年樹木，若然《蘋果日報》係一棵樹嘅話，種咗十年，究竟會結出幾多個蘋果呢？答案可能係……六萬個。根據八方嘅市場部同事滙報，《蘋果》喺噚日十歲大壽嘅一日之內，派咗六萬個蘋果畀讀者，實行同廣大香港市民一齊慶祝呢個十年一遇嘅大日子。其實《蘋果》九五年創刊亦係派蘋果，唔係新橋，不過市民都好受落。
十歲大壽，自然唔會只係派蘋果咁簡單，等八方喺度賣下廣告先：五個報頭可以換一張聖安娜餅券、一個報頭加一百零八蚊可以換領一本《蘋果日報》珍藏相集。
元老獲贈名筆
八方先睹為快，二百幾頁嘅相集全部都係《蘋果》同事過去十年，即係三千六百五十日以來嘔心瀝血之作，亦係香港人過去十年嘅集體回憶，照片中嘅情景，好似《獅子山下》嘅歌詞所講，「人生中有歡喜，難免亦常有淚。」咁九七回歸同7.1大遊行嘅大場面，當然不可或缺。
喺將軍澳壹傳媒大樓五樓，噚日舉行咗一個又簡單又唔隆重嘅頒獎禮，同場加送乳豬自助餐。一百四十三位由九五年創刊做到今日嘅開國功臣，獲得公司頒發名牌MontBlanc萬寶龍刻名靚筆一支，好筆贈資深同事，八方喺呢度恭祝《蘋果日報》仝人，跨越十年，再闖高峯。
爆料熱線：29290000、27860099
報料傳真：26239278
報料電郵：[email protected]
