「王子」大婚，細佬冇癮！羅馬球星托迪前日同意大利女星芭拉絲，喺羅馬AraCoeli教堂舉行婚禮，除咗隊友同埋羅馬高層到賀外，數以千計球迷冒雨企喺教堂外搖住羅馬旗祝福一對新人，認真夠派頭。不過，成場最冇癮怕且係卡斯辛奴，因為佢入場時被球迷猛噓，點解？鬼叫佢加盟祖雲達斯機會高咩！
話說當呢位同托迪以兄弟相稱嘅壞孩子入教堂時，外邊嘅球迷勁噓，大叫：「你走去搵卡比路罷啦！」搞到場面幾尷尬，不過大佬結婚做細佬嘅都好識做，平時包拗頸嘅佢識得克制住，之後重同其他賓客有講有笑，都算係咁囉。
講番個婚禮，托迪着住黑色燕尾服配條灰色褲，隻手就拎住頂灰色紳士帽，型爆；不過因為教堂嚴禁非嘉賓出入，道門閂到實一實，又焗又熱，難為有身紀嘅托迪嫂成場要猛咁用程序冊潑涼。
點都好，嫁到畀「萬人迷」，恨死隔籬，相信托迪嫂辛苦小小都唔會介意嘅。