美國青春女星蓮莎露夏恩（LindsayLohan）前日喺荷李活出席電影《搞鬼甲蟲車》嘅首映禮，當日蓮莎以一襲低胸吊帶裙亮相，非常搶鏡。而蓮莎近日接受訪問時，自稱好受黑人饒舌歌手歡迎，因為好多黑人男星想追佢，但佢只冧Eminem一個喎。
紅地氈變賽道
由蓮莎、米高基頓（MichaelKeaton）同麥迪倫（MattDillion）主演嘅合家歡電影《搞鬼甲蟲車》係以八○年電影《鬼馬神仙車》為藍本，故事講述蓮莎無意中擁有一架有人性嘅福士甲蟲車，最後佢哋重喺賽事中勝出㖭。
前日三位主角齊齊出席首映禮，幫大班小朋友影迷簽名同影相，主辦單位亦花盡心思，將紅地氈變成一條賽車跑道，重放咗好多福士甲蟲車造勢，搞到班小朋友鬼咁開心。
另一方面，蓮莎近日接受訪問時自稱好受黑人饒舌歌手歡迎，50Cent、P.Diddy以至DamonDash都曾經問經理人公司攞佢嘅手提電話號碼，佢話：「黑人男人都好鍾意我，50Cent話睇完我套《辣妹過招》後就一見鍾情，我真係嚇死，當時我諗：『Eminem喺邊？』因為我真係好鍾意佢。」
美聯社、路透社圖片
