歌影視三棲發展嘅台灣女星劉若英，最近秘密嚟咗香港，雖然唔知佢嚟做乜，不過就梗係唔少得行街shopping一番啦。
被發現即撇
近年香港好興買賣二手名牌貨，聽講好多明星啲手袋用過一次半次就會拎出嚟賣，所以乜乜巴黎、米蘭二手店都有好多今季嘅新款袋，唔知劉若英係咪睇中呢點，日前佢就同一個女性朋友去咗蘭桂坊嘅一間二手名牌店，見佢揀嚟揀去，都係鍾情Balenciaga呢隻法國牌子嘅袋，重拎起個袋嚟睇，又對住塊鏡左照右照，好enjoy咁款。當劉若英猶豫緊究竟買唔買之際，佢個朋友就發現門外有閃光燈，當時即刻好似如臨大敵咁，係咁遮住劉若英塊面，卒之劉若英就放低咗個袋，面黑黑咁離開。
佢哋咁緊張有兩個可能性，一係劉若英冇化妝，可能唔見得人，另一個就可能係劉若英覺得貴為最佳女主角兼當紅歌手，買其他人用過嘅袋可能係有少少寒酸，所以咪唔想俾人見到囉！
