飲食人誌：<br>老粵菜館賣漢堡包夾馬蹄肉餅正到出汁

不敢說只有年輕人才消費得起，只敢說年輕人更捨得花錢試創新菜式。大趨勢使然，有40多年歷史的「大喜慶」粵菜館近日也不得不來個大革新，食物跟裝潢同樣潮爆，甚麼西式漢堡包夾中式馬蹄肉餅、中式芝麻雞釀焗意大利粉，是九唔搭八了點，但要掏盡年輕人荷包內的一分一毫，這九唔搭八，是必要的。

記者：周頌堯
攝影：陳智良
模特兒：Katie

銅鑼灣「大喜慶酒家」以蟹王翅、金錢蟹盒馳名，太子爺高榮新師傅入廚43年，由最低的學徒、廚房雜役做起，升至現在的行政總廚，烹調傳統粵菜有豐富經驗：「家父60年代創辦『大喜慶』，我1962年開始學煮，1970年正式接手『大喜慶』。唔係誇張，𠵱家乜嘢粵菜都好，只要你講畀我知用乜嘢配料、煮法，我已經估到道菜係乜嘢味道、賣相係點。」自誇自然有恃，事實他獲獎無數，1996年獲「法國美食協會」頒發「金帶廚師獎」，2003年得「中國飯店協會」的「中國烹飪大師獎」，又曾當過電視嘉賓主持，有空可以收看亞視的《飲食無界限》，你會見到他的嘜頭。

■金毛、粉紅條子恤衫，高榮新師傅也予人潮爆感覺。

吊片肉餅芝士漢堡包$18
馬蹄吊片肉餅是「大喜慶」熱賣菜，高師傅：「有日靈機一觸，試吓玩漢堡包夾中式肉餅，估唔到效果出奇地好喎。」

一星期前，4層高的「大喜慶酒家」闢地下一層變身「粵食粵潮」新店，看高師傅一身裝扮與店舖新派裝潢夾到絕，確實潮爆！他有感現今主要消費者都是年輕一代，而傳統粵菜又予人老土陳舊的錯覺，故開這間既保留傳統粵菜精髓但又大玩Fusion的菜館，走的是茶餐廳路線，收的是茶餐廳價錢，由他負責廚房，一切運作及裝修布置全盤由子女打理。
說這是間非一般的茶餐廳也不為過，每晚十時過後餐廳會搖身一變成為酒吧，這是兒子Tony的主意：「近耀華街一帶好多酒吧，加上附近有好多OL，所以就索性茶餐廳搞埋Bar，希望唔只一家大細，就連收工鍾意落Bar吹水嘅人嘅錢，都一次過賺埋。」

意大利粉釀焗芝麻雞$148
細隻芝麻雞勝在脂肪少，中式炸子雞製法，雞身表面先上糖醋吊乾，雞殼內的意粉用上湯撈過然後去炒，最後釀入雞身一併焗，份量十足，製法繁複需一日訂做。

大蝦湯麵$58
湯底用本地鮮蝦頭加頂湯豬骨熬製，創意在把4隻6吋長中蝦先開邊，但又保留蝦殼放湯煮，高師傅：「我跟足新加坡切法，除咗美觀之外重方便食客進食，香港人懶剝殼吖嘛。」

潮爆酸辣湯$38
改良傳統上海菜，加入蝦、日本蟹柳和煙三文魚肉等配料。湯底用「大喜慶」老火湯底，內有火腿、老雞及豬肉，保留老店不用味精、雞粉的傳統作風。

草莓鎮江骨$48
用「大喜慶」自製鎮江醋醃製，再撈沙律醬，高師傅：「初初諗住沙律醬分開上，但後來決定直接撈喺鎮江骨上面，因為溶咗嘅沙律醬撈埋鎮江醋，酸酸甜甜重好味。」

馬拉盞魔鬼魚$68
高師傅曾經在星馬工作5年，所以對新加坡菜都有一套心得：「我把6至8公斤重的魔鬼魚，揀最嫩滑嘅背脊部份，劏完用薑汁辟腥，之後用馬拉盞炒，咁先夠香。」

■螢光吧枱好型仔，由有豐富酒吧經驗的女兒Anita負責。

■圓枱適合大班友一齊坐，靠牆座位很寬敞，無一般茶餐廳卡位咁逼狹。

■光線柔和的樹形掛牆燈，為店內提供不分晝夜的感覺，比一般茶餐廳更舒服好坐。

■抬頭，無大大個茶樓才老奉有的華麗水晶吊燈，改用金屬圓形吊燈，感覺Cyber不老土。

粵食粵潮（25750899）
地址：銅鑼灣勿地臣街15A地下
營業時間：10:00am至10:00pm
酒吧營業時間：10:00pm至2:00am
座位：68

阿輝：「個漢堡包非常之正，肉餅新鮮之餘亦估唔到有咁多肉汁。」

吳小姐：「炸雞個皮好脆，食埋裏面嘅意粉就非常飽肚。」

飲食人誌：老粵菜館賣漢堡包夾馬蹄肉餅正到出汁

飲食人誌：
老粵菜館賣漢堡包夾馬蹄肉餅正到出汁