煲呔假戲真做特首選舉，喺佢攞夠六百七十四個提名後就正式落幕。
自從煲呔六月二號宣布參選後，唔單止佢有佢忙碌，其實記者同佢都一樣咁奔波，事關唔少報館都派專人日日貼身追蹤煲呔，由佢朝早喺屋企餵錦鯉，跟住去教堂做彌撒，以至中午同邊個食飯，晏晝又見咗邊啲人，大家都跟到實一實，試過有記者行開一陣食個飯，轉頭煲呔就溜走咗，搞到記者後嚟都唔敢行開半步，時時刻刻都心驚膽戰，呢啲狗仔隊生活都幾苦㗎。
除咗跟出跟入，競選辦職員好多時「知情不報」，搞到記者好勞氣。好似選委約見煲呔係光明正大嘅事，冇理由唔可以公開會面時間，點知競選辦以私人活動為由，拒絕露口風，搞到記者要逐個逐個界別check，最好笑係原來人哋根本唔介意公開，反而係競選辦一廂情願，真係畀佢激親。
爆料熱線：29290000、27860099
報料傳真：26239278
報料電郵：[email protected]