財爺唐唐原本諗住做埋呢幾日署理特首，就可以將個檔攤交番畀煲呔曾，點知臨尾先俾人入球十二碼，遺產稅條例無端端喺立法會內會遭否決恢復二讀，又點會唔嬲到震吖？由於唔想喺煲呔登基前搞喎行政立法關係，所以情願十月再上會，不過呢鑊嘢，負責揸旗嘅財經事務及庫務局局長馬時亨就實要上身，馬局長當日身在韓國訪問，原本都唔怪得佢，弊在佢出訪前，批咗手下個常任秘書長放大假，結果就出事！
官場中人話，其實今次件事唔關工聯會三子玩失蹤事，因為佢哋都反對，最衰係民主黨冇口齒，轉軚反對；民主黨中人就笑政府，何俊仁已公開澄清話冇答應政府支持條例恢復二讀，況且，工聯會以往好多法例都反對，但未試過唔畀恢復二讀，因為喺大會保皇派佔大多數，佢哋反而可以大大聲做反對派，今次工聯會冇出蠱惑，佢就打死唔信！
爆料熱線：29290000、27860099
報料傳真：26239278
報料電郵：[email protected]