自從地產市道好轉，舖位租金升到癲之後，零售股已經冇自由行初推出時咁好炒，部份零售股更出現調整，廸生創建（113）在過去幾個月，曾遭個別基金減持，但股價仍然硬淨，實在難得。廸生即將在周三公布截至今年3月底全年業績，如無意外業績應該幾標青，睇吓到時能否令芬佬回心轉意。
廸生股價年頭由10元左右起步，2月最高升上15.20元，其後輕微回吐，之後轉為在14元水平橫行，昨日收市仍企於13.80元，計落仍升超過3成。
廸生業績靚仔，其實有迹可尋，公司在公布中期業績時，盈利有7760萬港元，比起去年同期大升9倍。但估計全年盈利升幅應該冇咁誇張，原因係旺角朗豪坊的西武百貨開舖成本支出大，但有證券行計過，全年盈利點都會有1.7-1.8億銀，上升幾十個巴仙。
另外，冠捷（903）公布完首季業績，同埋落實收購飛利浦的顯示器及平面電視業務後，獲多間大行唱好，但昨日股價急跌8％，收5.15元。經紀黃解釋，芬佬一般睇冠捷的目標價都係5.50-5.60元，既然已經到價，自然有人獲利。
慕容小初