與廠家A食完晏，未夠兩點，佢擒擒青話過去尖沙嘴搭船去珠海，視察工廠喎。廠家Ａ話諗住珠海都算交通方便，幾年後港珠澳大橋落成，就更加正斗，所以揀咗珠海建立據點。不過𠵱家就頭痛嘞，皆因請唔到專門人才如IT、軟件等等。左丁山問：「內地大學唔係大把畢業生咩？」廠家Ａ話：「係就係，不過多數冇經驗，冇exposure，如果要去上海、北京挖角，人工貴好多。退而思其次，請新畢業生啦，最多訓練吓啫，點知我去上海招聘，冇人願意到珠海喎，個個想留在上海、北京，當珠海冇到！」
直接投資（directinvestments）專家Ｗ亦在座，佢深有同感，佢哋間直接投資公司專門投資內地高科技企業，投資之後，兼埋做管理顧問，最重視財管主管人選。投資Ｗ話：「信得過嘅內地人，一啲都唔便宜，真正人工達到香港人嘅四分一、五分一左右。內地人最叻聽柯打，叫佢日日做一件事，會做得好好，快夾妥；升佢做主管，要佢隨機應變，自行決定，就會亂龍，所以到內地設廠生產最容易，搞服務就唔掂咯，我哋唔打醒精神就會死火。」
投資Ｗ在外國留學，對內地民情唔多熟，佢或者有所不知，一個社會慣咗聽中央講，話一就一，不容說二，自細上學就學習緊跟黨路線，統一口徑，成年之後，為外商服務，一時之間，點敢自作主張吖。目前中國嘅教育情況，最適宜製造業，金融服務業、財務管理，尚未有競爭力。
廠家Ａ認為中國高速發展至目前階段，人才供應唔夠，會稍為拖慢製造業以外嘅發展速度，香港嘅財務管理專才，有排都唔會俾內地人搶去飯碗。