城市脈搏1:<br>新潮流阿嬸無得撈索女通街派

城市脈搏1:
新潮流阿嬸無得撈索女通街派

踏入六月,有無發覺購物旺區旺角、尖沙嘴和銅鑼灣,突然湧現一班生力軍,他們不是向你派發傳單,就是跟你傾吓偈做問卷,或者宣傳手上的優惠卡、網上優惠等,源源不絕的學生大軍已經殺到,早前派發傳單的叔叔、嬸嬸,惟有暫時退隱江湖,唞唞暑!

記者:邵超
攝影:陳智良、周旭文
模特兒:Katie(Savaldor)、Milo、Sam、超仔(Zlect)

推廣員(模特兒較貴,不同工作及衣着都會有不同價錢,一般過千元。)
呢三位由下午三點做到五點半,各人已賺$3,000以上,逢星期六、日喺銅鑼灣都有機會見到佢哋。

免費雜誌笑住嚟派(多數時薪計,約$35-$40)

唔怕醜Sherry(20歲)
學生妹Sherry做Part-timeModel,以前曾經派過一次傳單,她說派書完全無問題,唔會怕醜,最緊要派啱對象就會好快派完。

■派發心得:「好多Coupon」、「雜誌嚟㗎」,畀封面途人睇清楚。

■雜誌大大本,有時派到應接不暇。

處女登場Tracy(22歲)
第一次派發雜誌的Tracy,由於派發地區多是商場外,搞到成日俾人趕,不過她完全覺得無所謂,因為雜誌有Coupon、有糖送,好易受落。如果套制服是衫褲全套會有更大作用。

■派發心得:大叫「送糖呀」、「做緊Promotion」,途人聽到一定會停低。

■免費雜誌的對象是年輕人,後生女派畀後生仔最易受落。

親切笑容阿欣(17歲)
罕有食檸檬的阿欣,試過有心急人衝埋嚟搶書咁滯。她說最緊要係同途人有眼神接觸,而且要笑容親切。

■派發心得:親切笑容,大叫「免費雜誌」

■雜誌封面吸引,途人猶豫一秒通常都會接。

叫得夠大聲阿草(19歲)
男仔派書仔、派傳單都難過女仔,有時同其他推廣員傾吓偈都唔錯,好似有人陪自己努力一樣。

■派發心得:男仔派女性雜誌,叫得大聲啲,講明係派畀女仔。

■男仔派女性雜誌,費一輪唇舌隨時慘食檸檬。

派扇姑娘Yuki(23歲)
「返Part-time暑期工,做三個鐘,時薪大約$40-50,喺旺角會多啲人去搶扇,好多男仔同阿叔搵我影相,但佢哋都好有禮貌嘅。」

最慘個案!!!
■每日逾三十度的氣溫,穿上mascot的人都係靠風扇為生。

推廣員:多勞多得 最緊要博
底薪+佣金+花紅($3,000-$13,000)

主動健談Annie(17歲)
Annie覺得做推廣員是多勞多得,不斷向筆者推銷呢張orangeappleclub卡 ,有齊潮區旺角、尖沙嘴和銅鑼灣的購物和食物優惠,都好抵。

■推廣心得:主動同人傾偈,有笑容和勤力。

■哥哥仔一臉無奈,但Annie一樣咁落力。

唔怕瘀Eva(17歲)
Eva想做寫字樓工但無人介紹好難搵,呢份工都係由朋友介紹入行,有心理準備途人會反應冷淡就唔覺瘀,但基本上途人都好有禮貌。

■Eva第一天返工,未知成績如何?

途人反應

■派免費雜誌不時遇到熱情的途人。

■遇到咁熱情的途人,索女們都特別興奮。

■Milo「免費雜誌封面好吸引,通常唔想接傳單會耍手拒絕,夏天有扇送都會接。」

免費書有乜睇

JACKSO@UPSTAIRS 樓上舖情報

本月新出的雙周刊,隔星期二推出,主打銅鑼灣和灣仔樓上舖情報,走中檔路線,第一期已有成本Coupon書共$8,000優惠,非常吸引。
派發地點:銅鑼灣、灣仔

BeautyExpress 一店一優惠

第六期即將出版,以美容主導,以月刊形式推出,亦是一店一優惠,走大眾化路線,對象是20-40歲女性,期期以明星做封面。
派發地點:中環、銅鑼灣、尖沙嘴、旺角

姊妹試讀版 樣樣有啲

主流雜誌都搞試讀版,總之每樣執少少,擺明拋磚引玉,證明在街上免費派發雜誌有可為。
派發地點:旺角地鐵站口

着數街 全本Coupon

基本上是一本Coupon書,幾乎每頁都有商舖優惠,每期搵不同地區的着數,所以優惠非常多元化,要搵心水優惠就要逐頁揭。
派發地點:未定

成功派發傳單絕招

派發傳單工作向來是日曬雨淋,但同情不能當飯吃,因為十居其九,那些宣傳單張對你來說,都是無用的,真係可免則免。不過你有你避,傳單阿姐、阿叔總有方法完成任務,由模特兒Katie向你示範。

■Katie:派傳單?無難度!

方法1:搓紙團

將傳單搓成紙團,然後塞畀途人,人的自然反應是想看看呢團字究竟是乜東東。

■途人Sam「唔知咩嚟,無喇喇塞畀我,要打開至見到係乜,又幾高招喎」

方法2:擦身而過

企定定唔係辦法,趁人過馬路時,來個擦身而過,即時反轉張紙塞畀佢,一定中!

■途人超仔「突然間就接住咗,咁樣做好醒目,無得避。書仔當然吸引過傳單,派嘅人有禮貌同笑容,都會接嘅。」