港股繼續在13700至14000爭持，市場看淡者仍佔多數，但市勢跌唔落，相信會如早前所料，大藍籌窩輪在本周相繼到期計價後，恒指會破位而上，初步估計在14200水平會有阻力，但整固後再上衝，創出今年新高機會甚大。
國企股有勢，金屬價升勢再起，銅價又創出新高，早前推介的江西銅（358）同鞍鋼（347）可續持有，待高位獲利回吐。吉林化工（368）如冇搞作，升勢不會如此強而有力，上周五搶到上1.89元高收，成交續暢旺。吉化上月底低位1.38元，上周尾段升勢轉急，由低位起計升幅已達37%，消息應該不離以下3個，就係業績好轉、大股東注資，又或私有化。其實，講到業績同私有化，同類股中的上海石化（338）亦值得留意，其業績持續有好表現，而私有化機會亦不容抹煞。
首季業績勝吉化
吉化升咗咁多，上石化可說未郁過，月初低位2.50元，上周五收2.625元，升幅僅5%，雖然過去3個月有大行曾多次減持，令到上石化股價一路低沉，當然，日後有3個可能性，就係大行繼續減持，又或唔再減持，又或者掉轉頭增持。如屬第2同第3個可能，由於股價已跌咗咁多，唔排除會大幅回升。
今年首季，上石化業績遠比吉化為佳，獲利10.75億元（人民幣．下同），同比升46%，其中主營業務收入106.5億元，來自主營業務收益19億元，升34%，經營溢利14.9億元，升56%。
雖然上石化首季盈利較去年第4季減少21%，而油價又持續企於高水平，但石化產品售價提升，足以抵銷成本上漲，估計05年度（12月結算）盈利可上升到42億元，每股盈利0.58元（折0.547港元），派息0.22元（折0.207港元），現價PE只係4.8倍，息率有7.8厘。股價回升，條件足夠。
中石化（386）將按上市的承諾，逐步整合旗下的H股同A股上市公司，北京燕化（325）已完成私有化，作價較帳面資產淨值有溢價62%。上石化3月底的每股資產淨值2.77元（折2.61港元），若被私有化，作價會在4元水平。現價購入，除可收高息外，亦有機會賺50%。
郭兆誠