噚日係父親節，日本電影《老友狗狗》就嚟喺香港上映，有份為套戲配音嘅陳奕迅（Eason）、阮小儀以及一直支持保護遺棄動物協會嘅宣萱，噚日就有出席套戲喺旺角舉行嘅宣傳活動。
第一年以老竇身份過父親節嘅Eason，幾日前周圍同人講話點樣慶祝父親節，點知噚日記者見到佢好似冇晒心機咁，問Eason點過父親節，佢話：「有乜好慶祝，成班狗仔隊跟住，不過都預咗，食得鹹魚抵得渴，咪返屋企囉！」再問Eason送乜畀老竇陳裘大，Eason又咿咿哦哦咁話：「我都送唔到，冇乜好送，咪送班狗仔隊！」
宣萱專收流浪狗
宣萱就帶咗佢隻愛犬BomBom出席活動，佢話：「BomBom係我啱啱入行喺電視城執番嚟嘅流浪狗，本來我都想帶佢去捐血，不過佢年紀大，唔可以捐。」
