警匪片易拍！跟住槍戰、追車、爆破等幾條鐵律，雖不中亦不遠矣；警匪片難拍！個個都係呢幾道板斧，真係難有新鮮感！就以導演陳木勝為例，自96年《怒火街頭》後，冇人懷疑過佢嘅能力，不過中間亦經過《特警新人類》及《雙雄》等嘅低潮；今個星期新推出《三岔口》，係另一套真正叫人拍手嘅警匪電影，畫面壓迫震撼、故事曲折奇情，難得三個男主角都交到戲，環環相扣！絕對係本周必睇！
記者：朱崇德
《三岔口》可以話今個星期最熱賣3區！不過同為4月底上映嘅《早熟》，今次一於由戲院鬥到落DVD，窮追不捨都喺本周推出DVD；西片方面，戲碼亦相當強勁，必買嘅有《娛樂大亨》！另一套《夜半鬼開門》口碑都唔錯，幾驚嚇，而且好多人話佢個dts-EX（6.1聲道）勁靚，加埋原電影聲效又做得好，夜麻麻一個人睇，隨時嚇到由梳化椅彈起！
三個男人三角矛盾
港產式「警匪片」，一直以來都走唔開「件」頭上嘅框框！《三》不同之處，主要係講述三個軌迹各異的男人故事；郭富城係一個失去摰愛的警探、吳彥祖則是一個不守常規的殺手、鄭伊健更是一個表裏矛盾的律師，各人故事本來毫不相干，冥冥中命運卻將他們連上，交織出不可預測的人和事。
郭富城在一次調查洗黑錢及押解犯人中，碰上了冷血殺手吳彥祖；在暗殺犯人後本可全身而退的吳，竟然不守行規，暗中向郭爆料兼做「針」！而郭在調查期間，碰上幕後集團主腦的御用律師──鄭伊健，而鄭的妻子，又恰巧和郭苦尋十年的妻子有九成相似，三個人、三角關係，好似被一條無形的線牽扯着；一搭上了，鬥智角力，真係只有至死方可休止！
郭富城初見火候之作
《三》可以話一齣幾創新的警匪式港產片，由一位女性編劇寫男人戲，真係多咗幾分少見的細膩感；電影中最值得一讚係郭富城，佢由過往嘅「過火」演出，到今次扮演一名潦倒警探終見有「火候」，真係有幾分驚喜；當中兩幕車廂獨腳戲，看着自己最愛的人變為人妻，那種失去摯愛、有苦難言，真係觀者都有一種千刀萬剮的感覺。另一有驚喜演出者係吳彥祖，《旺角黑夜》嘅大陸殺手已非常正，今次當全職殺手，感覺是更冷血兼入戲，而且重多咗幾分星味！講全劇最正位，首數係中段郭、吳的鬧市追逐戲，由跳樓、跳天橋，到追入街市以膠袋笠頭互毆，橋段創新之餘，畫面壓迫、配樂緊湊，再加鬆緊的拍法，十幾分鐘真係有一種透不過氣的感覺；不過可惜結尾比較雜亂了一點，但仍算情理之中，否則應可再加分。
DVDPRO
電話：23326326
地址：旺角奶路臣街6E德發商場地庫B4舖
