前政務司司長陳方安生退而不休，最近代表母親方召麐捐出四十二幅畫作畀美國三藩市亞洲藝術博物館，陳太話回歸後香港高官較少外訪，佢覺得香港喺國際間聲譽下降，所以要親自出馬去外國介紹香港最新情況。
陳太此行除咗代表母親捐畫外，之前重喺一個畢業禮上演講。佢接受訪問時話相信新特首曾蔭權上場後，唔會重提23條立法，因為香港目前無迫切性做呢件事，外傳北京想盡快立法純屬揣測。
陳太作為「香港良心」，佢認為新特首應該代表香港人向北京反映市民心聲，佢話中、港重有好多誤解、猜疑，如果新特首能夠促成雙方諒解，對落實一國兩制會有好大幫助。
陳太胞兄方曼生最近被揭出陳年風流帳，重涉及一宗離奇命案，有記者問陳太如何處理，佢嘅招牌「四萬」笑容立即消失，表示不予置評。
爆料熱線：29290000、27860099
報料傳真：26239278
報料電郵：[email protected]