收咗一批讀者電郵，涉及之問題，種類繁多，左丁山竟然成為教育顧問、婚宴顧問、尋找校友顧問以及賽馬知音。
（一）Ｍ小姐問結婚擺酒，去馬會沙田會所好還是山光道馬會會所好，其實你應該去山光道及沙田會所睇真啲，問清楚啲，同會所宴會經理講清楚。至於左丁山私人意見，已用英文電郵直接回覆（因為左丁山唔識中文打字），希望對你嘅決定有幫助。
（二）學生Ｃ問去名校Wharton，已用電郵答覆。
（三）香港大學工業及製造系統工程系行政主任CynthiaLeung小姐來電郵問賓架Ｇ（窩輪專家）嘅聯絡方法，等你哋尋回失散校友。左丁山已經通知賓架Ｇ，系主任麥啟寧教授及梁小姐要搵佢，請佢打電話與港大聯絡。
（四）蘇先生要求左丁山電郵或者傳真《信報》孫思嘅文章，對唔住，恐怕《信報》話我侵權，請你去圖書館搵番五月二十六日《信報》嚟睇吓。
（五）Ｓ媽媽話兒子考入一間聖字頭名校小學，最初好高興，第二晚就瞓唔着。相信你係驚怕愛兒追唔上，你問本欄好耐以前提及嘅一間中環超級補習學校嘅地址，真係好對唔住，已經太多人問啦，但左丁山曾答應放料之名人，可寫但不可透露學校名字，因佢恐怕學校逼爆玻璃也。請Ｓ媽媽以平常心應付兒子學業，不可催谷過甚，提早扼殺兒子嘅學習情緒，盡量以輕鬆方法誘導佢睇中英文課外書，係不二法門。
（六）幾位讀者來電函贊同報販意見（本欄六月十三日），佢哋支持港台繼續播放賽馬節目，認為報販心聲反映咗大部份普羅馬迷嘅意見。好，請各位馬迷寫信去畀朱培慶，副本畀特首辦公室，講你哋嘅心聲！