過氣流行天王米高積遜（MichaelJackson）被控十項狎童罪嘅官司，全部罪名不成立，過去為單官司憂心忡忡嘅米高fans同佢嘅家人，終於鬆咗一口氣。
播放率大增
為咗答謝支持，米高將會聯同兄弟姊妹喺香港時間今日凌晨喺加州一間賭場開小型演唱會，慰勞七百名支持佢哋嘅親友同歌迷。據講為單官司暴瘦嘅米高，將會以JacksonFive班底上台表演，實行與眾同樂。
唔少電視同電台報道事業已走下坡嘅米高積遜呢單官司時，會順便播埋佢嘅歌曲，有人統計過，喺官司宣判前一日，佢嘅歌喺全美嘅播放率係一日一百九十七次，官司勝出後，播放率忽然升到一千一百七十一次，升幅達五倍幾。
而米高嘅唱片銷售量喺官司宣判後亦突然增加，有唱片舖老闆重話𠵱家佢嘅唱片供不應求㖭。傳聞孭住二億七千萬美金（約二十一億港元）債務嘅米高，今個月會得到可觀嘅版權收入，可以話係因禍得福。另外，有知情人士話米高打算同兄弟到歐洲同亞洲巡迴賺錢，因為佢喺全球各地仍然有市場。