鄭中基從未正面坦誠與蔡卓妍（阿Sa）相戀，但這已是公開的秘密，一向予人花心形象的鄭中基，今次似乎相當認真，更將女友的名字紋在手臂上，他表示這是信心的表現，絕不反悔，而且拍拖會以結婚為大前提，希望四十歲前成家立室。
花心？
女友信我就得
三十三歲的鄭中基與二十二歲的蔡卓妍（阿Sa）相戀大半年，雖是公開的秘密，但二人堅持對戀情不宣之於口。偷偷摸摸的地下情並不輕鬆，但當事人卻甘之如飴，鄭中基說：「我冇偷偷摸摸，只係唔再好似二十幾歲時將感情放得咁高，𠵱家搵食先。」
愛的紋身唔戇居
圈中藝人的感情曝光後，很易被「唱」散，鄭中基卻十分有信心，他說：「我唔係怕俾人唱散先唔講，唔係個個都俾人唱得散㗎，但我覺得每次拍拖都有好多是非出現，當感情滲入咗政治因素，我會同對方講清楚，溝通好重要。」
有傳鄭中基手臂上有愛的紋身，刻着女友阿Sa的英文名Charlene，夏天至今他仍每日穿着長袖外套遮掩，十分避忌，但鄭中基仍堅持手臂上沒有紋身，他說：「我個新紋身係冬天紋，喺背脊度，𠵱家未太熱我先着外套。」問他將女友名字刻在身上，不怕若日後分手會後悔？鄭中基說：「我唔覺得咁做戇居，梗係有信心先咁做，冇得考慮咁多，可能未分手前就死咗呢，可能聽日世界末日呢，你點知？」
鄭中基向來緋聞不絕，早前他被雜誌指當街與女化妝師擁吻，有指阿Sa很信任他，鄭中基說：「兩個人一齊一定要信任，唔通成日猜度住咩，如果因為人哋寫幾寫，佢就覺得我花心冇安全感，咁根本就唔會開始。」
鄭中基自言很少夜蒲，但每次去玩都會被偷拍，他說：「同我拍拖晚晚都同我一齊，只係一晚朋友生日出咗去玩，就俾人影到，咁唔會有乜問題㗎，有問題都係信任問題。」鄭中基自言每次拍拖都不會背着女友偷食，但外人認為他花心，他對此說：「以前好激氣，𠵱家嬲都無謂，只要我在乎嘅人信我就得。」
與千嬅性格不合
鄭中基當年與楊千嬅分手時，曾背着負心人之名，但他自言也受過感情挫敗，他說：「拍拖冇對錯㗎，我次次都係大家相處一段時間覺得性格唔啱，大家改吓遷就吓，再過一段時間都係唔得，咪分手囉，次次都係性格不合，我諗唔只係我，每對情侶分手，大部份都係話個男人唔啱㗎啦！」
每對熱戀中的男女都會憧憬未來，鄭中基也不例外，他表示每次拍拖都以結婚為大前提，他說：「我𠵱家努力搵錢，希望四十歲前結婚，一結婚就生仔，我唔想太遲生，否則個仔十八歲，我七、八十歲震住同佢哋玩咩？」至於未來的太太，鄭中基說不介意年齡差距大，最重要思想溝通得好，而且婚後太太一定要留在家，不再工作。
