遠東酒店（037）對上星期五有兩球股數成交，呢期二三線股靜到甩轆，遠店有咁嘅成交，已經似樣，短線可以嚟一轉。
呢期酒店股郁郁吓，似係炒定迪士尼概念，遠店尾隨，但老實講，遠店喺香港，只得風之后原居地一家酒店，說服力差啲啲。反而要留意係，呢期有報道同系遠展（035）喺美國揸咗近10年嘅地產項目，有機套現兼大賺6億銀，不期然聯想到遠店透過聯營Bolan（45%），喺澳洲揸住嘅舊悉尼鎮主題公園項目（03年已經停業，家陣正研究緊項目用途），可能分分鐘有運行。保守啲睇，遠店上年6月底應佔聯營7995萬元資產淨值，喺公園03年已經停止營運兼欠奉現金流嘅情況底下，何去何從，點都唔會拖得幾耐。若果遠店唔玩，平手離場，起碼每股套現番0.16元；又若果項目有新搞作，有新消息刺激入市，亦唔係壞事。Beforethat，遠店NAV近1蚊，有資產值墊底，趁有勢兜轉即日鮮，應該冇問題。
德祥博反彈有得諗
德祥企業（372）今年2月高見1.44元，三個幾月以嚟跌咗63%，博彈一彈，應該有計，又講兩點：第一，2月時候，德祥爆棚哥及大福財務將所揸嘅德祥CB，分別兌換1.26億股及2.5億股德祥新股，大福財務跟住以每股1.06元，悉數配售所兌換新股畀第三者，上家暫時身家減半，而同期股東權益中，多咗德意志牌頭。
第二，德祥已發行股數由原先6.9億股，增加到爆棚哥等兌換CB後10.7億股，NAV雖則攤薄到得番1.32元，但現價（0.53元）有近60%折讓，升到上50日線0.63元，資產折讓重講緊50%過外。
錢雋