十一年前，《明報》記者席揚被北京巿中級人民法院裁定竊取同刺探國家機密罪名成立，被判有期徒刑十二年；十一年後，《海峽時報》中國首席特派員程翔以間諜罪名被國安監視居住，失去自由。十年前，《蘋果日報》創刊；十年後，第十屆人權新聞獎破紀錄收到超過三百份參賽作品，《蘋果》勇奪八個獎。
共305份提名
十年人事幾番新，由定康年代到建華年代，由北京欽點董建華到曾蔭權黃袍加身；十年來，維多利亞港嘅天空陰晴不定。唯一歷久不變嘅係，中國人權狀況依然故我，所以神州大地嘅炎黃子孫要「自由行」到香港公祭趙紫陽，所以7.1有五十三萬人上街爭取民主普選香港特首。
噚日係第十屆人權新聞獎頒獎典禮，十年來嘅人權新聞，見證咗中國人為自由為公義艱苦奮鬥嘅光榮歲月，剛巧《蘋果》亦都同香港人經歷咗十載春秋。今年人權新聞獎總共有三百零五份提名，係十年來最激烈嘅一屆，反映香港社會愈來愈重視人權。
《蘋果》勇奪四個大獎、四個優異獎，自豪嘅當然唔只《蘋果》，重有五十三萬流住汗上街嘅香港人，重有哀悼趙紫陽嘅良心市民。頒獎禮請來馬來西亞人權鬥士顏重慶演講，佢話好多亞洲國家都重停留喺民主嘅雛形，菲律賓係學緊行路嘅BB，新加坡就連孕育民主都唔准，但佢冇講香港係點。從曾蔭權講極都講唔出普選時間表嚟睇，香港最似一個患咗先天肌肉萎縮嘅病童。
爆料熱線：29290000、27860099
報料傳真：26239278
報料電郵：[email protected]