記者協會周年餐舞會噚晚喺洲際酒店舉行，果然高潮迭起，一開場即有驚喜，估唔到周一嶽局長平時表情嚴肅，噚晚竟然大講三級笑話。佢噚晚嘅講題就係曾蔭權的秘密。周局長話由港督以至特首都俾人偷聽，彭定康時代，啲特工裝咗偷聽器，結果發現淨係收到啲狗吠；到董建華上場又被人偷聽，但亦冇乜嘢聽到，除咗董太嘅聲音。𠵱家進入曾蔭權時代，周局長建議喺曾生間房度唔止裝偷聽器，重有裝埋錄影拍真人騷，監視曾生曾太嘅活動，反正佢話夜晚啲電視節目都唔好睇，而曾生又鼓吹生三個，所以曾生曾太嘅房間活動，一定會令到收視爆棚。
「四人幫」樂隊籌15萬
周局長講完，第二個高潮，就係全香港最貴嘅「四人幫」樂隊上場，包括兩個大狀湯家驊同梁家傑，再加個九鐵主席田北辰同醫管局行政總裁何兆煒。呢隊貴價樂隊絕不欺場，全部着粉紅色衫兼戴黑超，又請埋立法會秘書長馮載祥伴奏，結果喺數次安歌下，為記協籌到成十五萬。前光華新聞文化中心主任江素惠翩翩起舞，大跳佛拉明高，亦為記協進帳三萬五千蚊。
對於一眾嘅記者而言，喺阿爺欽點下自動當選嘅煲呔曾，以及愛國記者程翔被內地拘捕都係最熱話題，記協主席張炳玲致辭時都以呢兩件事為重點，特別借程翔諷刺煲呔，話程翔得到七百七十個記者聯署支持，相反煲呔都係得嗰七百一十四個選委支持，即係煲呔支持度都唔夠程翔高。
張炳玲亦都好感歎咁話，程翔事件凸顯喺中國採訪係一種「另類的複雜」，咪就係中方對記者嘅採訪底線時高時低，令到記者都無所適從，但佢話記協一定會盡力而為。
傳真︰2623-9278
電郵︰[email protected]