舊時聽前輩銀行家講「滙水」，以為即係「滙率」，廣東話之中，滙水與滙率似乎冇乜分別，不過講滙率就似乎追上時代一啲。
最近再翻閱高陽名著《胡雪巖》，先知道自己冇記性，高陽在第一頁「楔子」，已經講「滙水」，滙水唔係廣東話，而係清朝乾隆時代末期，山西商幫（中國票號專家）之中有一間顏料舖（始創於天津，聞名全國）經常入四川採購顏料，因交通不便，不易攜帶大批銀両，於是日昇昌收銀出票，持票人憑票到指定地點嘅聯號兌取現銀（叫做滙兌），滙兌要收滙費，名為「滙水」，計滙水要考慮到地方遠近，遠則貴，近則廉；銀根時鬆時緊，鬆則廉；最後要計算銀錠成色。
高陽話英商麥加利銀行設分行於上海之前，全國金融事業就係由山西幫、寧波紹興幫掌握嘅嘞。
與前輩講起滙水，佢話咸豐年代，滙水當然淨係指滙費，但香港銀號興起，涉及外國貨幣兌換（例如台山阿伯滙美元返鄉下），滙水慢慢與滙率成為同義詞（以前國際貨幣與黃金掛鈎，滙率固定），講講吓，我哋重誤以為滙水係廣東口語㖭。
前輩講完滙水，順帶提供一個笑話，佢以前替一個「寧紹幫」打工，老闆孤寒到極，唔肯找街數係家常便飯，連核數師嘅核數費都唔肯畀。核數師連番追討之下，老闆話：「深水埗有一層舊樓，連租約以極低價轉讓畀你，算係找數，你唔要就罷。」核數師死死氣以極低價買咗層樓，諗住一兩年後交吉出售，應該有得執。點知買咗先至知道租客竟已變成二房東，轉租畀人經營一樓一鳳，收租困難，核數師又唔敢講惡，話一聲收樓即刻俾租客講粗口鬧，為之苦過弟弟！