喺PS2上要數出色RPG遊戲，《FinalFantasy》、《DragonQuest》同《Drag-OnDragon》都必定榜上有名，而呢幾套大作都有個共通點，都係SQUAREENIX出手製作。的而且確SQUAREENIX喺RPG遊戲方面的確有一手，無論畫面到遊戲性，每次都為玩家帶來新鮮感及話題，今個星期名作系列之一《Drag-OnDragon2:lovered，ambivalenceblack》（DD2）終於推出，今次除咗扮騎士打餐飽外，更可以坐上飛龍噴火殺敵！
記者：許福合
(c)2005cavia/SQUAREENIXAllRightsReserved.
上一集《Drag-OnDragon》於2003年PS2上推出，雖然屬於新作，不過憑SQUAREENIX喺RPG遊戲嘅功力及名氣，仍然受到唔少機迷所注意，而結果亦無令玩家失望，以故事性連貫取勝，筆者認為以畫面比較，《Drag-OnDragon》與《FF》等大作仍然有段距離，而《DD2》好明顯作出針對性改進，人物設定都可達到《FF》級水準，淨睇CG動畫同畫面已經值回票價。
招式簡單易記
對於「好動」嘅人，可能同筆者一樣，玩RPG最怕就係要喺村莊逐個搵NPC對話，如果唔識日文，就要靠撞彩，你都咪話唔頭痕！《DD2》雖然都係以日文介面為主，識得睇對了解劇情當然有幫助，不過即使唔睇，其實都無傷大雅，遊戲內動作元素比例好重，感覺似動作遊戲多過似RPG。玩家主要控制出身奇特嘅龍之子Nowe，介面以第三身為主，遊戲一開始就要經過基本操作訓練先可以成為騎士出戰，而除咗基本戰鬥方式外，亦加入咗連續技及魔法攻擊，不過招式都唔算難記，例如一開始嘅「□△△△△」就好易出，唔似得一啲格鬥Game咁難記難出！
上天下地掃怪物
成為騎士之後，第一次出戰就有機會坐飛龍，龍嘅速度同戰力驚人，還可用瞄準器將怪物鎖定用火球攻擊，而且還可以一次過鎖定多個目標攻擊，不過空戰都未能顯出飛龍威力，空對地時先夠好玩，既可變成固定大炮攻擊，又可配合魔法，打Boss或對付陸上大軍，都係好幫手！空對地戰時，還可以隨時按「Select」，咁就可以變回陸地戰，讓角色賺取經驗值及最重要工作——撿錢，錢並非萬能，不過就可以喺商店買到唔少有用裝備同道具。
無限次轉換角色
新作畫面再次證明SQUAREENIX製作功力，靚之餘人物設定亦好考心思，幾個主角都各有特色，而且唔會有個個差唔多樣嘅感覺，玩家主要操作男主角Nowe，不過隨着遊戲進行，會有同伴加入，例如一開始就會加入女角Eris，武器同技能各有特點，最正係今集同上集設定唔同，可以隨時按「R2」轉換角色，而且無限次數，當一個有危險時就可以隨時換人保命，另外配合戰術亦可有唔同玩法，如女角因為使用長槍，攻力可能略有不及，不過就可以橫掃千軍，要應付千軍萬馬就比較適合，另外亦要為將來着想，唔好只玩一隻，否則將來等級就可能追唔上，要換人都唔夠打。
活用小地圖撿寶物
雖然《DD2》用上三種唔同戰鬥模式，不過特點係操作相近，筆者認為最Friendly都係每次有新招，畫面都會有新提示，教你用咩掣使出新招，而且每個模式近似動作都係使用相近按掣，好似人同龍閃避都係使用L1同R1，好易熟習！畫面右上角地圖亦值得一提，原本只會以顏色分敵我，不過只要將R3按下，地圖就會變成更詳細嘅區域地圖，從小地圖你就會發現原來有唔少「秘道」，入去必定有驚喜，一係送你一堆怪物，好運嘅就會有個寶箱等住你開，可得到大量金錢甚至裝備！當進入打Boss狀態時，左邊畫面會出現Boss生命值，Boss級怪物對一般攻勢當搔痕，要坐上飛龍利用必殺技攻擊先有明顯效果，不過要留意，好多Boss都識得跳起反擊，要將飛龍控制喺既安全而又隨時可攻擊距離，再利用魔法攻擊，宗旨係遠離怪物。
遊戲資料
主機：PS2
製作廠商：SQUAREENIX
類型：RPG
遊戲人數：1人
