今個禮拜日係父親節，好多商場有優惠或活動。
長和系紅磡黃埔新天地，搞「回敬至愛多寶爸爸」，揸車去到，會按仔女數目送最多三粒鐘免費泊車，碌卡購物滿八百，免費洗車。
香港仔商場就有「爸爸免費唱K」優惠，消費滿四百，有一百蚊卡拉OK現金券。
九倉銅鑼灣時代廣場，周日有二百對父子同父女兵，用圖畫或文字，畫寫五十幾件巨型組件，再砌出十六呎高巨型機械人，身上刻住「ILoveDad」，爹哋肯定好冧。
新地多個商場有嘢搞，主打係大埔超城，有「新地至潮爸爸Day」，考驗兩代合拍同合作性。消費滿三千，可換iPodShuffle。
南豐將軍澳廣場，就請嚟嘉賓麥長青同張美妮，主持「超能爸爸大比拼」，冠軍有五千蚊獎品。
另外，信和屯門市廣場搵嚟藝人苗僑偉伉儷做嘉賓，現場有百人耍太極。