【本報訊】近月挺曾不遺餘力的賭王何鴻燊昨日再度「預言」，候任特首曾蔭權在執政後，將恢復港英時期的高地價政策。他更不惜自爆在董建華時代，明知「八萬五」建屋目標勢必拖垮樓市，仍然「揞住個心」唱好樓市，「講咗七年大話」。學者相信，雖然曾蔭權一定不會公開表示支持高地價政策，但會以穩定樓市之名，推行有利地產商的措施。 記者：劉碧思、陳沛敏
何鴻燊昨出席其子何猷龍擔大旗的上市公司新濠國際的股東特別大會後，談到對候任特首曾蔭權的寄望。他說：「問我驚董特首（應為曾特首）呢次會唔會用高地價政策，好似英國佬以前咁?我好坦白，我認為呢個係好辦法，因為香港無乜資源，除咗地就無，啲地英國佬嗰陣當佢係寶貝，當佢係黃金，𠵱家曾特首亦咁支持，要地產穩定，輕輕攞番高少少嘅價錢，即係高地價政策，我認為係啱晒。」
「地產呢支柱係最重要」
何鴻燊一再強調地產是本港重要支柱，對整體經濟牽連甚廣，同時吸納周邊地區的游資投資本港，「菲律賓、馬來西亞、新加坡、台灣、高麗（韓國）、日本，所有有餘錢嘅一定拎嚟香港，買兩樣嘢，一係買樓，一係買股票。你要記得，股票中地產佔百分之六十幾，講到尾我認為地產呢支柱係最重要，地產呢支柱係對好多行業好大牽連，譬如八萬五之後，我哋（地產商）無得起，政府起晒，形成建築冧晒、律師樓無生意、銀行無咁多生意、酒樓無人去，賣樓嘅又無晒，中原、美聯確係幾乎執笠。」因此他認為，為穩定地產，把地價「輕輕」推高亦屬合理。
九七年前本港樓市達至高峯，但自董建華宣布「八萬五」政策，香港樓市一沉不起，何鴻燊昨直言一直不支持「八萬五」政策。他說：「董生嗰七年，我都係做（地產建設商會）會長，我已經一路都話，『喂特首，呢手八萬五唔通㗎』，迫到我講咗七年大話，年年都話『（樓市）就快好番喇，大家放心啦，一定得架喇。』實係揞住個心講。」
「同聲同氣易管治好多」
他強調對曾蔭權有信心，「尤其佢係廣東人，我哋香港人大部份都係廣東人，同聲同氣易管治好多。你以前特首董生係北方人，講嘢有時都呢呢𦧲𦧲，的確𠵱家有咗呢個廣東人特首，我就好高興，兼夾佢同澳門個特首又係廣東人，兩個又易傾好多。」
香港業主會會長佘慶雲回應時強調，作為業主希望樓市平穩，樓價不會再下跌，但若實行高地價政策，羊毛出在羊身上，只會苦了想買樓小市民，重演九七前瘋狂市況，「𠵱家大學生畢業都係搵八千至一萬蚊個月，叫佢哋點供？」他又批評何鴻燊「不嬲都係擘大眼講大話」，現在重提八萬五是「等人落咗台先踩人兩腳，無乜意思。」
學者：政府不讓樓價偏低
嶺南大學公共管治研究部主任李彭廣指出，高地價政策有利地產商，因可為他們托市及封蝕本門，何鴻燊的言論是代表地產商心聲，希望政府加大力度控制土地供應，讓他們取得較佳的回報。他相信曾蔭權一定不會公然表示支持高地價政策，但由於政府收入依賴土地收入，他會以穩定樓市為名，不會任由樓價處於低水平，客觀上對地產商有利。
中原集團主席施永青則認為，特區政府其實「一早已行返轉頭」奉行高地價政策，因本港六成人擁有物業，政府透過控制土地供應穩定樓市，負資產減少，破產人數減少，經濟才得以復甦。
中原城市領先指數是中原地產及城市大學合作編製的樓市指標，反映六十二個大屋苑的樓價走勢，以九七年七月即回歸時為基準（100點），按此計算，樓市在回歸後最多曾跌了七成。