電影《早熟》的橋段，原來在貓界都時有發生。今次意外發生在旺角Kitty媽旗下十二隻貓中，由奀妹飾演薛凱琪，至於房祖名有兩大熱門人選，分別是灰豬和黑豬，由於對手力有不逮，灰豬爭贏男主角的機會被睇高一線。BB一出世順理成章成為旺角十三妹，雖然唔知邊個先係經手人，但Kitty媽無意滴血認親，搞到十三妹都唔知叫邊個做阿爹好，𠵱家啲男女關係真係複雜！
記者：邵超
攝影：林栢鈞
旺角十三妹履歷
原名BB，香港出生，住喺旺角，兩個月大，父不詳，母奀妹，在Kitty媽家中排行十三，天資聰敏，樣子伶俐，三個阿媽輪流照住，包括親生阿媽奀妹、契媽祥嫂和眾貓米飯班主Kitty媽，婆婆更是錫到佢燶。牠的出生是一個奇迹，現在就告訴你，旺角十三妹，一個傳奇的誕生的經過。
臉型：扁口扁臉，額頭有花紋
毛色：啡灰白
誰是BB經手人？灰?黑豬嫌疑最大！
因為兩公貓還未做閹割手術，現時鎖定嫌疑犯為灰豬或黑豬，而後者因為只有單子（一粒睪丸），且灰豬經常「偷襲」奀妹，故灰豬嫌疑最大。事發後，Kitty媽不敢怠慢，兩兄弟即時做手術免除後患。聽吓大家嘅口供……
其他證貓供詞
根據嫌疑最大嘅灰豬、黑豬作供，以及10位證貓畀嘅口供，結果係……無結果，BB身份仍然係個謎，可以CloseFile喇！
驚慄36小時BB差啲無命
貓兒懷胎58-63日，就有落地孩兒，所以將兩個月大BB的出生時間推前三個月，就是搞出貓命的時間。奀妹在Kitty媽不知情下，珠胎暗結，有口難言，終於出事喇！
「嗰日奀妹原來係肚發炎，突然流血，即刻帶佢睇醫生，照超聲波後，醫生話已經有一隻死咗，開刀後發現，本來6隻嘅𠵱家只係剩番BB，醫生重話佢可能過唔到3日。當晚奀妹要留院，我哋惟有抱BB返屋企，佢當時奄奄一息，眼都無開。」
「當晚BB無母乳，全家人輪流每隔一小時用針筒餵貓奶，餵三、四次奶後聽到佢喵喵叫，爬吓爬吓，有少少生命迹象至放心。一直用暖水袋保持佢嘅體溫，又用棉花睇吓佢屙唔屙到，食幾次奶唔屙又驚佢便秘，搞到我都神經緊張，真係眠乾睡濕咁照顧佢㗎！」
第三天，當婆婆進修回家後，終於見到一隻活潑精靈的BB；一星期後，食得屙得又瞓得，全面康復！
BB全屋最惡但最Cutie
Kitty媽並非首趟家有喜事，祥嫂是第三個入主Kitty家的貓，與芝麻糊生五胎，送走兩隻，剩下細糊、棉花糖和肥仔，已經有足夠湊B經驗，奀妹與神秘貓搞出貓命，實情係事出突然。這個家庭貓隻眾多，還有祥嫂與前夫所生的金毛強，灰豬和黑豬兩兄弟，以及咪咪、肥婆、Muffin等獨立個體戶，關係複雜到暈。祥嫂係群貓之首，BB又認咗佢做契媽，祥嫂嘅囝囝囡囡都唔敢郁佢一根汗毛，至此橫行無忌。
「BB𠵱家係全屋最惡嘅，佢鍾意玩，經常追住貓尾撲埋去，就算被摑兩巴掌都唔識驚，其他貓都無晒佢乎，加上有祥嫂好有母性咁照顧佢，有邊個敢蝦佢?!」
芝麻糊愛人摸金毛強似狗
Kitty一家都是愛貓之人，相信香港很少人可以容納一屋十三隻貓，一樣米養百樣人，貓亦然。你見過唔吼貓糧嘅貓未吖？每次餵零食，只有祥嫂一家六口會齊齊舉手和應，其他就睬你都儍。「一唔餵開就係咁，貓都講習慣。」
其實除咗BB，其他貓兒都各有奇技𠱁人歡喜。肥仔最愛黏着Kitty弟弟，輕易贏得歡心；BB柔軟舒適，是婆婆的心頭肉；而芝麻糊和金毛強就是Kitty的至愛，芝麻糊每次待Kitty入屋及晨早起床，都要Kitty摸一輪肚仔才安樂。金毛強性格像狗，連助跑及煞車的姿勢都抄足狗樣，夠晒爆笑。凡此種種，都是養群貓之樂，真係唔恨得咁多！
