每逢世界盃決賽周前一年嘅洲際國家盃，都係畀世盃主辦國籌辦大賽一次「熱身」機會，今次德國亦唔例外，無論招待球隊抑或記者，都有好多唔完善地方。
好似巴西現時所住嘅酒店，據講酒店電腦冇上網服務，搞到班球員練完波冇乜娛樂消遣，艾馬臣就叫球隊職員到店舖買兩部PS2遊戲機，同隊友卡卡、薛羅拔圖等大玩流行到爆燈嘅實況足球遊戲解悶，重估唔到艾馬臣原來係高手，用自己效力嗰隊祖雲達斯，或者聯賽爭標死敵AC米蘭，一樣贏波；相信以巴西首場分組賽表現，睇怕班球員之間嘅大戰有排玩。
講到電腦上網服務，對一啲到德國採訪賽事嘅外國記者好重要，有記者就呻新聞中心冇免費寬頻上網，想用就要每日畀成近五百港紙，成個賽事十五日就有優惠，大約五千港紙就得，就連德國記者都話組委會搶錢！