聽日係一年一度嘅父親節，但係廖啟智（智叔）就完全冇心情慶祝，因為佢○三年患上血癌嘅五歲細仔文諾，近日血癌復發，目前喺醫院接受治療，呢排智叔同太太陳敏兒都忙於去醫院照顧囝囝，相當辛苦。
「康復機會有四成」
智叔話自從文諾個病復發之後，佢同太太心情跌至谷底，智叔話：「上個月囝囝因肺炎再次入院，入院後一直唔退燒，之後驗血先知佢個病復發，𠵱家最少要接受九個月化療。雖然我哋有宗教信仰支持，但始終都唔係咁易接受，我可以做到嘅就係正面啲去接受。從醫學角度睇，囝囝康復機會有四成，現階段我會同太太互相扶持、互相開解。」其後智叔又有感而發話：「康復未必係必然，但係我知道佢會去邊。」
提到父親節願望，智叔話：「我最想係四父子一齊開開心心、快快樂樂去踢波，但呢個唔止係我父親節願望，係我每一日嘅期望。」