現年四十二歲嘅湯告魯斯（TomCruise）同二十六歲女友姬蒂荷姆絲（KatieHolmes）嘅戀情全球熱爆，噚日靚佬湯喺巴黎出席《強戰世界》嘅記者會時，直認喺周五凌晨已經喺艾菲爾鐵塔塔頂向姬蒂求婚，姬蒂重即時答允，兩人現時已經係未婚夫婦。
婚期問未來外父
靚佬湯喺噚日約香港時間黃昏喺巴黎舉行《強戰世界》記招，跟得女友姬蒂當然一齊出席。當時有記者問佢兩個係咪訂咗婚，點知靚佬湯突然一本正經咁話：「冇錯，我今朝早已經喺艾菲爾鐵塔同佢求婚，所以我根本冇瞓過！今日係好日子，因為我同個好女人訂咗婚。」此話當堂令全場記者騷動。
靚佬湯講完呢番話後，即刻用情深款款嘅眼神望住姬蒂，呢個時候記者先發現姬蒂嘅無名指上已經戴住一隻巨型鑽戒。之後，有記者問佢哋幾時結婚，靚佬湯即時大賣關子話：「我哋重未討論，詳細情形，問姬蒂爸爸！」有人幫佢兩個計個，靚佬湯同姬蒂喺四月二十八日公開戀情，點知喺五十日之後，已經訂婚。
另外，由姬蒂主演嘅重本巨製《蝙蝠俠——俠影之謎》，近日喺全球各地開畫，套片周三喺美國上畫時亦有唔錯成績，首日開畫收得一千五百萬美金（約一億一千七百萬港元）票房，係美國史最佳周三開畫電影嘅第十一位，成績都算唔錯。