最近有好幾隻股份在公布配股後，股價一路係咁升，但偏偏又冇乜嘢炒作消息配合，成個不求人格局，雖然接咗貨嘅投資者帳面獲利豐厚，但小初就估計跟進的散戶唔多，可能散貨無門。
例如百威國際（718）在兩個月前公布，以先舊後新方式配股，每股4仙，配售6.82億股，集資2700萬元。股價由當時唔夠5仙，一路升到家陣，昨日再升10.92％，收0.132元，成交亦愈嚟愈大，成交股數有9183萬股，金額1182萬元。
經紀陳話，百威自從轉咗新老闆及配股後，股價走勢完全唔同晒，據講有人想股價做好啲，然後就會有後着。
上市以來一直低調的浪潮國際（8141），亦在上月公布配售5200萬股，每股0.36元，集資1872萬元。浪潮嘅股價，由當時唔夠0.40元，穩步上揚，昨日再升1.67％，收0.61元，成交股數633萬股，金額375.5萬元。
經紀陳話，浪潮雖然低調，但基本因素OK，坊間重傳隻股有機會在明年轉主板，所以有人肯接貨，並唔係冇道理。
慕容小初